ភ្នំពេញ៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានបញ្ជាក់ថា នាឡិកាដែលកម្ពុជាផលិតជូនប្រធានគណៈប្រតិភូដែលមកចូលរួមកិច្ចប្រជុំកំពូលអាស៊ាននេះ គឺចង់បង្ហាញថាកម្ពុជាអាចធ្វើបាន។ សម្តេចបានថ្លែងបែបនេះនៅក្នុងសន្និសីទសារព័ត៌មានស្ដីពីលទ្ធផលនៃកិច្ចប្រជុំកំពូលអាស៊ានលើកទី៤០-៤១ និងកិច្ចប្រជុំកំពូលពាក់ព័ន្ធ នៅវិមានសន្តិភាពថ្ងៃទី១៣ ខែវិច្ឆិកា ឆ្នាំ២០២២។

សម្តេចតេជោបានថ្លែងថា៖ «អ្វីជាអត្ថន័យពិតប្រាកដ គឺខ្ញុំចង់បញ្ជាក់ប្រាប់ទៅដៃគូរបស់យើងថា កូនខ្មែរមានលទ្ធភាព ដើម្បីផលិតនូវនាឡិកាសម្រាប់ជាកាដូដល់ប្រមុខរដ្ឋ និងប្រមុខរដ្ឋាភិបាល»។

នាយករដ្ឋមន្ត្រីកម្ពុជាបានបញ្ជាក់ថា សម្តេចនឹងបន្តពាក់នាឡិកានេះនៅក្នុងកិច្ចប្រជុំកំពូលអាស៊ាននៅឆ្នាំទៅមុខទៀត។

ក្នុងនាមកម្ពុជាជាប្រធានអាស៊ានឆ្នាំ២០២២ សម្តេចតេជោ បានផលិតនាឡិកាចំនួន ២៥គ្រឿងសម្រាប់ចែកជូនដល់ថ្នាក់ដឹកនាំកំពូលដែលមកចូលរួមក្នុងកិច្ចប្រជុំកំពូលអាស៊ានលើកទី៤0-៤១ និងកិច្ចប្រជុំពាក់ព័ន្ធនានា។

គូសបញ្ជាក់ថា កិច្ចប្រជុំកំពូលអាស៊ានត្រូវបានបញ្ចប់ដោយជោគជ័យ និងប្រកបដោយមានសមិទ្ធផលជាផ្លែផ្កាជាច្រើន។ កិច្ចប្រជុំមួយនេះត្រូវបានធ្វើឡើងចាប់ពីថ្ងៃទី០៨ ដល់ថ្ងៃទី១៣ ខែវិច្ឆិកា ឆ្នាំ២០២២៕